[p. 1]
A la veille de la Pentecoste quant li compaignon de la table reonde furent venu a Kamaalot et il orent oï le servisse et len vouloit metre les tables a heure de nonne, lors entr.... (ms troué)... en la sale une mout bele
damoisele, et fu venue si grant oirre que bien le pooit
len veoir, car ses chevaux en fu encore toz suanz, et ele
descent et vient devant le roi si le salue, et il dist que
Diex la beneïe. " Sire, fet ele, por Dieu dites moi se Lancelot
est ceenz.
- Oïl voir, fet li rois, veez le la." Si li mostre et
ele va maintenant la ou il est et li dit : " Lancelot je vos
di de par le roi Pellés que vos avec moi venez jusqu'en
cele forest." Et il li demande a qui ele est. " Je sui, fait
ele, a celui donc je vos parol.
- Et quel besoign, fet
il, avez vos de moi ?
- Ce verroiz vos bien", fet ele.
" De par Dieu, fet il, et g'irai volentiers." Lors dist a un
escuier qu'il mete la sele en son cheval, et li aport
ses armes, et cil si fet tout maintenant. Et quant
li rois et li autre qui ou palés estoient voient ce si lor
en poise mout. Et neporquant quant il voient
qu'il ne remaindroit il l'en lessent aler. Et la reïne
li dit : "Que est ce Lancelot nos lairez vos a cest jor qui
si est hauz ?
- Dame, fet la damoisele, sachiez que
vos le ravroiz demain ceenz ainz hore de disner."