[ Ms - Trans Trans - Trad Index visuel Accueil ] 
si tost com tu eus tes eulz eschaufez de l'ardor
de luxure maintenant en chaças humilité, et atresis
orgueil, et vousis aler teste levee ausi fierement
come un lyon. Et deïs en ton cuer que tu ne devoies
riens prisier, ne ne priseroies ja messe tu n'avoies
ta volenté de cele que tu veoies si bele. Quant li anemis
qui ot toutes les paroles si tost come la langue
les a dites conut que tu pechoies en pensee et en
volenté si entra lors touz dedenz toi, et en fist aler
celui que tu avoies si longuement ostelé, einsi
te perdi Nostre Sires qui t'avoit norri et escreu, et
garni de toutes bones vertuz, et t'avoit si haut
levé que en son servise t'avoit mis. Si que quant
cil quida que tu fusses ses serjanz, et le servisses des
biens qu'il t'avoit prestez. Tu le lessas maintenant.
Si que quant tu deus estre serjanz Jhesucrist tu
devenis serjanz au deable, et meïs en toi tant
des vertuz de l'anemi com Nostre Sires i avoit mises
des soes. Car contre virginité et chasteé herberjas
tu luxure qui confont l'une et l'autre.
Et contre humilité receus tu orgueil come cil qui
ne prisoit nus hom avers soi.